Lei ta duru, pero lei ta lei
Den nan afan pa hustifiká akseptashon di un kolega kondená di krímen di korupshon, parlamentario den Konseho Insular i Staten a trese un konfushon atrobe tokante lei, sentensia, i kulpabilidat. Segun sierto parlamentarionan, tanten ku un persona kondená pa un krímen ta bou di apelashon den “hoger beroep”, no por konkluí ku e persona ta kulpabel. Aparentemente, ta trata di brua tera pa turdi pueblo.
Pasobra lei ta otro. Pa kuminsá ta asina ku tanten ku Korte di Hustisia no a dikta sentensia a base di prueba ku un akusado ta kulpabel, mester konsiderá ku e akusado no ta kulpabel. Pero unabes ku Korte a dikta ku e ta kulpabel, ta eksaktamente esei e ta i e ta keda: kulpabel. E hecho ku un persona ta apelá su sentensia, i ku a posponé aplikashon di su kastigu, no ta pone e sentensia ei disparsé, ni e pruebanan, ni su kulpabilidat, ni e kastigu. Un persona konvikto ta keda kulpabel te dia Korte di Apelashon dikta diferente.
Manera un parlamentario mes a bisa resientemente na latin: lei ta duru, lei ta lei.
Kousa Komun, 040212
|
