Gobièrnu ta malinformá,
pa despues ke sensurá
Den henter e konmoshon riba e insidente entre Minister-presidente di Antia i un periodista, nos no mester pèrdè bista riba e loke a kondusí na e insidente. Komentando riba un karta ku Den Haag a manda pa DCA. durante su último rueda di prensa, gobièrnu a duna un informe na periodistanan ku no a keda komprobá, ni sikiera pa e dokumento ku Promé Ministro a presentá komo prueba.
Kousa Komun ta di opinion ku malinformashon di parti di gobièrnu den un rueda di prensa ofisial ta un asuntu serio. P’esei mester hasi e pregunta si ta trata aki di un simpel ekibokashon, un diferensha di interpretashon, òf un intento pa malinformá pueblo. Den kaso di ekibokashon, un simpel korekshon lo tabata basta. Ku un aklarashon ta logra kita un diferensha di interpretashon. Si no hasi un korekshon, ni ofresé un aklarashon, e pregunta ta keda si ta trata di un intento di malinformashon.
Den un artíkulo publiká na sèptèmber 2003, Kousa Komun a señalá rasgonan di diktadura den nos gobernashon. Malinformashon tabata un di nan. Na kuminsamentu di aña 2004, nos tin ku konstatá ku e rasgonan aki ta persistí, i te asta a bira pió. Atrobe ta trata di stigmatisá i menasá hende ku tin un opinion diferente, òf ku simplemente ta kumpli ku nan trabou i nan konsenshi.:
- Nan lo ta bomba, makamba pretu i spion, i lo atendé ku nan severamente.
- Ta akusá Korte di Hustisia di dikta sentensia polítiko sin niun fundeshi.
- Ta buska esküs pa por kumpli ku menasa ku lo kuri ku mando di Ministerio Públiko.
- Ta purba di paralisá institushonnan independiente manera Reda Sosial, pa haña kòntròl polítiko riba sèn pa ayudo sosial na pueblo.
- Ta trata di kontrolá kompanianan di gobièrnu ku mester sirbi interes general,no via hunta di komisario so, pero te den nan mando finansiero.
- Ke infiltrá i kondishoná prensa, radio i televishon ku e intenshon pa kontrolá informashon liber na pueblo.
Diktadura ta kuminsá kaminda poder ke kontrolá hustisia, prensa, i institushonnan sosial, i kaminda ta trata di menasá i humiliá siudadanonan ku tin un opinion diferente. I si no para un proseso diktatorial, e por bai di malu pa pió so. Si despues di menasá hende, nan persistí den nan derecho, no ta sobra poder otro kaminda sino di kumpli ku e menasa hasí.
Nos ta bolbe ripití:
Tur loke ta nesesario pa maldat triunfá
ta pa hende di buena fe keda ketu.
Kousa Komun, 040118
|
