Drai bek na nòmber di demokrasia i hustisia soshal
Aparentemente, e koalishon nobo a kere ku e mester logra aseptashon di Slotverklaring a todo kosto. Nan ta baha kabes pa nombramentu koruptivo i enrikesimentu propio ku ta kosta pueblo miones pa aña, awor i pa generashonnan ku lo sigui. Ademas e gastu lo subi ku kada grupo nobo di diputado i parlamentario. Pero e kosto berdadero ta hopi mas serio.
E koalishon nobo ta sakrifikando demokrasia i bon gobernashon den su esfuerso pa pone Slotverklaring riba mesa atrobe.
For di dia promé di yüli diputadonan lo sinta na e mesun mesa kaminda a aprobá e nombramentunan ku pueblo ta repudiá. Representantenan di pueblo lo reuní den e mesun sala kaminda apénas un siman promé ta trapa te hasta aparensha di demokrasia pa hinka mas sèn den saku propio. Kiko polítikonan ke hasi pa restablesé konfiansa di pueblo den demokrasia i gobernashon despues ku nan a laga nan koleganan violá esaki?
Dunamentu di oumento di salario na karidat ta un bunita gesto, pero e ta tapa e berdadero engaño. Pasobra e ta keda sèn tumá for di den saku di pueblo.
Lantamentu di komishon pa studia un ke otro ta un maniobra pa salba koalishon, pasobra kiko tin di studia ora e inhustisia ta mas kla ku di dia?
Kousa Komun ta di opinion ku mester tuma desishonnan di prinsipio ora ta trata di demokrasia real i hustisia soshal. Si e gobièrnu aki ta kere den demokrasia, e no ta warda desishon di Gobernador. E mes ta drai bèk e voto di Konseho Insular, i anulá e oumento di salario i areglo di penshun.
I si e gobièrnu aki ta kere den hustisia, e ta kanselá e nombramentunan polítiko ku a kai den último simannan, tambe si tin ku paga daño na esnan enbolbí i hiba lucha den korte. E kosto di esaki ta muchu ménos ku e daño hasí na e kompania i servisionan konserní, i e gastu mensual di salarionan fabuloso pa dékada largu, na persona ku no ta mustra di tin e kapasidat nesesario.
Si e mandatarionan i representantenan nobo ta respetá nan mes, nan lo refutá públikamente e pretenshon polítiko ku pueblo mester rekompensá nan trabou ku puesto i plaka. Den un demokrasia berdadero, pueblo ta rekompensá òf rechasá ku voto.
Un pueblo meresé partido polítiko ku ta traha pa demokrasia den partido, kalidat den miembro, kapasidat den kandidato, i integridat den representante i mandatario. Partido ku ta buska hende ku kurason pa pais. Esei promé ku tur kos.
Pasobra ta solamente un hende sin kurason pa su pais ta kometé akto di faboritismo i enrikesimentu propio riba kustia di pueblo.
Kousa Komun, 070702
|
