Polítikonan ta na kareda
Partimentu di puesto den servisio di gobièrnu pa motibu polítiko, sin niun eksigensha ni prosedura, miéntras e servisionan ta sklama pa hende ku kapasidat i eksperensha.
- Promoshon di sueldo pa favoritonan miéntras ámtenar kapasitá i ku eksperensha ta keda frusa riba e mesun stul.
- Pushamentu di kompania di gobièrnu ku partidario, famia i amigu, komo ku pueblo ta kubri tur gastu ora di paga pa entre otro koriente, telefon i gasolin.
- Biahamentu i gastamentu di plaka di representashon sin duna kuenta ni rason, miéntras ku no tin sèn pa por ehèmpel formashon di enfermera.
- Entrada reimu, ku tur tipo di gastu pagá, pa miembro di Konseho Insular, miéntras ku ta bin reunion mal prepará, esta, si bini mes.
- Oumento di propio entrada ku tres mil florin pa luna den un gòlpi, miéntras ku un gran mayoria di pueblo ta sin entrada mes.
- Gañamentu di pueblo ku ta su deber pa duna èks-polítikonan puesto, miéntras ku e ehérsito di mucha ku ta kaba skol sin haña trabou ta sigui krese.
- Un penshun fabuloso despues di a sinta komo polítiko un par di aña, miéntras ku mayoria di nos grandinan apénas ta sobra sèn pa kome ora a kaba di paga hür, awa i koriente.
- Partnernan den koalishon ku ta bisa ku for di dia promé di yüli si tur kos lo bai segun regla, miéntras ku nan ta tolerá mal gobernashon di nan futuro koleganan diputado.
- Un oposishon ku ta kondená ku palabra, miéntras nan ta kobra nan oumento huntu ku nan koleganan di koalishon.
- I, por último, intimidashon di medionan i siudadano ku ta tribi di protestá kontra tantu bagamunderia.
Bon wetá, no tin tantu nobedat den e aktitut di polítikonan. Loke si ta nobo ta e furia i e deskaro ku esaki ta sosodé kuné últimamente. Ta opvio ku polítikonan a komprondé ku nan aktuashon a pone ku un gran mayoria di pueblo ke haña refugio serka gobièrnu di Reino, pa asina protehá pais di un sakeo polítiko total. Nan pániko ta pone nan na kareda pa graps loke por ainda, lagando atras un pais plan barí.
Pero e krímen di mas grandi ku polítikonan ta kometiendo ta ku nan ta kibrando speransa di un pueblo riba un eksistensha humano, salú i liber di pobresa, ku derecho riba trabou i enseñansa adekuá, i liber di kriminalidat. I por último, liber di opreshon i lastramentu ki ora ku un siudadano sali bisa bèrdat.
Esnan ku ta duda ainda mester lesa e rapòrt di Kontraloria General ku a bira públiko e siman aki, indikando ku aparato di gobièrnu insular a krese ku mas ku un kuart den un par di ana. Segun e rapòrt, gastu di personal a oumentá ku 35 mion florin pa aña, pa e bira un total di 117 mion. Ku otro palabra, riba kabes di kada alma riba e isla aki, sea trahadó òf sin trabou, ansiano, penshonado, ama di kas, mucha di skol, yu of yuchi, ta kresiendo un debe nashonal di mas ku dos shen sinkuenta florin pa aña, sin konta interes. Konkretamente, e sèn aki mester bini for di mas impuesto, òf for di fondo pa salubridat públiko, enseñansa, ayudo sosial, kombatimentu di pobresa.
A bira tempu pa nos komprondé ku nos tur ta bai sufri mas di loke nos a kere. Ku no por warda te próksimo elekshon pa ekspresá nos desaprobashon. I ku nos tin ku hasi esaki fuertemente i sin miedu. Pasobra bo por lastra un persona, bo por oprimí vários, pero bo no por sera henter un pueblo su boka.
Kousa Komun, 070527
|
