Programa di partido; Kòrsou bieu òf Kòrsou nobo?
Inskripshon di listanan di kandidato pa partisipá na elekshon ta tras di lomba i partidonan a kuminsá ku kampaña pa gana votadó pa nan respektivo listanan.
Ku bishita na kas di votadónan, aviso via televishon, radio, korant, pamflèt i otro medionan, kada partido lo laga pueblo sa kon bon nan ta i ku ta pa nan kandidatonan pueblo mester vota.
Awor un kos ta komuniká ku pueblo, otro kos ta e mensahe ku pueblo ta kapta.
E mensahe ku pueblo ta kapta i lo tene kuenta kuné no ta únikamente e loke polítikonan ke komuniká durante e kampana aki.
Pueblo ta tene kuenta tambe ku e maneho ku polítikonan a hiba durante e tempu ku a pasa, ku resultado di e plan ku nan a presentá anteriormente i ku e ehèmpel ku polítikonan a duna a base di nan komportashon.
Na opinion di Kousa komun, e mensahe ku partidonan tin pa pueblo den e elekshon aki no por ta un réplika di esnan di elekshonnan anterior.
Ta un Kòrsou nobo i diferente ta nase, ora Kòrsou bira pais outónomo den Reino hulandes.
Mas ku kambio di un struktura polítiko i estatal, pueblo mester eksperensha un berdadero kambio riba tereno sosial, ekonómiko i kultural.
Un Kòrsou nobo mester krea perspektiva nobo i finalmente mester resultá den mehoransa di e kalidat di bida di pueblo.
Ku algun eksepshon, no por bisa te na e momentu aki ku polítikonan en general a adoptá un estilo i komportashon, ku ta korespondé na kreashon di un Kòrsou nobo.
Ta interesante pa tuma nota di kontenido di e programa ku partidonan ta presentá, pa mira si kisas ei si polítikonan a tuma den konsiderashon e nasementu di un Kòrsou nobo.
Kousa komun ta kere ku un bon programa di akshon mester tene kuenta por lo ménos ku siguiente aspektonan: E mester enserá solushon pa problemanan urgente, intenshonnan pa próksimo periodo di gobernashon i un vishon pa futuro; e mester ta konkreto riba prioridatnan ku pueblo mes a indiká; e mester ta pagabel i realisabel riba tèrmino korto i mediano; e mester ta elaborá na un moda ku e relashon entre medida i metanan por ser rekonosé; e mester ta skibi na idioma simpel i kla ku hende di tur nivel di formashon i edukashon por komprondé.
Tumando na kuenta ku Kòrsou tin ku prepará pa un era nobo, votadónan mester por saka for di kada programa, kua ta intenshon i prioridat di e partido pa ku asuntunan manera:
- Bon gobernashon
-maneho korekto di finansa públiko,
-maneho kontrolá di presupuesto,
-responsabilisashon di mandatario pa maneho públiko i finansiero, gobernashon demokrátiko, transparente i hustu.
- Desaroyo ekonómiko
-klima di invershon,
-struktura i haltura di impuesto,
-kuido di medio ambiente,
-maneho energétiko,
-transporte públiko, infrastruktura urbano, di kaminda i di telekomunikashon, -agrikultura, hortikultura i peska,
-oportunidat i seguridat di trabou i di entrada.
- Desaroyo sosial i kultural
-salubridat i bienestar di pueblo,
-enseñansa, formashon i edukashon di hóben i adulto,
-kuido i protekshon pa muchanan bou di kuater aña i siudadanonan riba sesenta aña, -maneho di hubentut i famia,
-rekreashon i deporte,
-kultura i arte,
-balor i norma,
-protekshon i sosten pa esnan sosialmente debil,
-seguridat i protekshon di persona i propiedat,
-kasnan adekuá i pagabel, etc.
A base di kontenido di nan programa pa e elekshon binidero, e votadó konsiente mester por distinguí e partidonan serio ku ta konsiente ku Kòrsou ta na kaminda pa un era nobo, for di esnan ku no ta kapas pa atendé ni e asuntu serio aki, ku seriedat.
Kousa Komun
070311
|
