Si nos ke bira un pais, nos mester ta un komunidat
E rumbo desordená, agresivo i te hasta ofensivo ku e diskushon riba futuro estatal a kue, ta algu ku ta bai hopi mas profundo ku posishonamentu riba Slotverklaring.
Ku poko pasenshi pa tende otro, falta di rèspèt pa opinion diferente, lantamentu di bos agresivo, i remarke ku un tono rasista, ta purba fòrsa otro pa aseptá un posishon.
E manera di hiba diskushon di último tempu ta trese na kla di dia diferenshanan profundo, ku tin nos komunidat separá den diferente grupo. Na superfisie nos ta pretendé di ta biba banda di otro sin muchu problema. Pero ei bou tin persepshon i resentimentu ku ta resultá den un polarisashon kresiente den tur situashon ku ta eksihí diálogo i konklushon. Gruponan ta desbaratá otro su opinion, parlamentarionan ta agredí kolega ku palabra, rumannan ta resolvé diferensha di opinion ku violensha, medionan ta publiká tur loke ta keda bisá sin distinguí entre bèrdat, probabilidat, insinuashon, kalumnia i mentira.
E diskushon riba Slotverklaring ta un bon ehèmpel di kon e diferenshanan i resentimentu ku nos no ta papia riba dje ta paralisá nos riba momentunan ku ta krusial pa desaroyo di nos komunidat.
Si nos ke forma un pais ku ta habri porta pa tur su siudadanonan bai dilanti sin wak nan orígen, kreensha òf opinion polítiko. Si nos ke ekstendé un man na nos ruman ku ta sufri pasobra nos ta responsabel pa nos komunidat. Si nos ke kuida nos pais pa pas’é pa nos yunan, mas grandi i mas próspero ku nos a hañ’é di nos mayornan. Enfin, si nos ke para riba nos propio pia, sea den un laso estatal ku otro paisnan,òf komo pais independiente, nos tin ku siña konosé nos diferensha- i dolónan, i rekonosé esun di otro gremionan. Siña komprondé e pakiko di nos diferenshanan, i trata na rekonsiliá esakinan, di moda ku nos por definí nos komunidat a base di relashonnan sano i habrí.
A yega e ora pa skohe.
Òf nos ta lanta un diálogo nashonal ku berdadero intenshon pa logra un rekonsiliashon di nos diferenshanan ku ta stroba nos di forma un nashon. Òf nos ta keda un komunidat di konvivensia dividí, kaminda tur ku ke por abusá di nos inabilidat pa haña otro den loke al fin i al kabo ta nos tur su deseo: un komunidat kaminda kada individuo ta asumí su responsabilidat individual i pa su komunidat, i kaminda kada individuo tin espasio i medionan sufisiente pa traha na su propio desaroyo den un sistema ku ta demokrátiko den tur sentido.
Ku otro palabra, un pais ku ta respetá su mes i su siudadanon, i ku ta meresé rèspèt di otro paisnan.
Mester por. Al fin i al kabo, Mandela a logra esaki ku su pais, ku tin un historia mil biaha mas kompliká i manchá ku esun di nos.
Kousa Komun, 061214
|
