Periodista ta bira komisario i èks-premier empresario
Nombramentu di periodista den puesto di komisario di kompania di gobièrnu a lanta un krítika fuerte. Tabatin hopi komentario den medionan di komunikashon i hopi hende a ekspresá nan desaprobashon.
Tambe e hecho ku èks-premier Ys aparentemente ta negoshando un puesto di trabou ku un grupo finansiero grandi, apénas algu despues ku el a sinta na mesa ku nan komo promé minister, a topa ku komentario krítiko.
Sin duda e asuntu di periodista-komisario ta unu serio. Lòs for nan profeshonalidat i integridat personal, ta asina ku e personanan enbolbí tin ku sirbi dos interes pareu. Komo komisario nan tin ku representá interes di gobièrnu den su kompanianan. Komo periodista nan tin ku vigilá e funshonamentu di huntanan di komisario, na interes di komunidat. Un prensa ku ta funshoná ku integridat i kredibilidat ta esensial, i mester evitá kalke situashon ku por hasi daño na su integridat.
Kousa Komun no ke kita for di e fama profeshonal i íntegro di èks-premier Ys. Pero esei no ta kita ku ora bai traha pa un grupo finansiero asina lihé despues ku a sinta na mesa ku nan komo gobièrnu, ta bon pa bini un splikashon. Pasobra meskos ku den e kaso di periodista-komisario, esaki tambe ta lanta un sombra di duda riba integridat den gobernashon. Lo ántes posibel, Staten mester trese klaridat riba e proseder di tantu gobièrnu komo e kompania finansiero, pa mantené konfiansa den integridat di nos sistema demokrátiko, tantu den komunidat, komo serka invershonistanan.
Den e kaso di komisariado riba nivel insular tambe mester evitá tur situashon ku por komprometé posishon independiente di prensa, i manipulashon polítiko. Aki tin un tarea pa asosashon di prensa komo wardadó di independensha periodístiko, i pa Konseho Insular komo kontroladó di gobernashon.
Kousa Komun, 060614
|
