Integridat di proseder ta base di demokrasia
Ora parlamentario ke oumentá nan propio salario, ni nan mes no ta sinti bon, wetando kon a trata di evitá publisidat riba e asuntu. Si Bestuurscollege nombra Sekretario Insular sin tene solisitut abierto, esaki ta resultá den duda abierto di komunidat. Insistensha polítiko pa lanta un outoridat semi-komersial semi-polítiko pa manehá playa públiko ta trese duda riba e motibu, i resistensha di pueblo. Tur e aktividatnan dudoso aki a tuma lugá den algu mas ku un siman.
Luna pasá por a sinti duda den komunidat tokante posibel empleo di un èks-premier serka un invershonista grandi, i nombramentu di periodista den hunta di komisario di kompania di gobièrnu. Kousa Komun a trese dilanti ku mester manehá situashon ku por krea duda den integridat di e aparato di gobernashon, spesialmente den nos komunidat chikí, kaminda fásilmente hende por kai den diferente funshon. Na di promé lugá e proseso mester ta transparente. Si tin proseder eksistente, no mester desviá for di dje, i mester splika ampliamente kon e prosedura a anda. Na di dos lugá mester tene interes ku por choka separá for di otro. Por ehèmpel: e mesun persona no por skirbi komo periodista riba un kompania kaminda e ta komisario.
Kiko prinsipio di transparensha i separashon di interes ke men den e tres kasonan resien?
Transparensha ta dikta ku ora ta trata di oumento di salario di parlamentario, mester diskutí públikamente riba e motibu. Miéntras organisashonnan manera IFE i Sentro di Mucha Brakapoti ta den peliger di sera porta pa falta di kontribushon di gobièrnu, ta difísil pa komprondé ku si tin sèn pa oumento pa parlamentario. Un órgano ophetivo lo mester evaluá funshonamentu i prestashon di tantu e parlamentario individual komo parlamento den su totalidat, pa por hustifiká haltura di e salario. I mester indiká un profil di kalidatnan mínimo pa un parlamentario, meskos ku ta e kaso ku kalke otro posishon di trabou, sigur ku un salario haltu asina. I pa evitá tildamentu di interes propio, e oumento no por drenta na vigor pa e parlamento ku a disidí riba dje, sino te despues di un próksimo formashon.
Den kaso di nombramentu di Sekretario Insular sin tene solisitut habrí, no tin awa pa laba e duda. Maske ku e motibu por tabata falta di tempu,, tòg mester a sigui e prosedura korekto. No ta importá kon bon e persona ku a keda nombrá mes ta, òf kon korekto e intenshon di Bestuurscollege tabata.
Finalmente, si Bestuurscollege berdaderamente ta preokupá ku funshonamentu di nos playanan públiko, e mester aktua konsistente i tene influensha polítiko i komersial leu. Si mester di un organisashon pa mantené playa, dikon no forma e direktiva i su maneho a base di sektornan manera turismo, komersio, rekreashon lokal, medio ambiente, i organisashonnan di bario, i tene polítika afó. I lo ta bon pa splika dikon no por a simplemente aserká Carmabi òf LVV,ku ta metí kaba ku kuido di playa.
Integridat, base di gobernashon demokrátiko, ta sumamente difísil pa mantené. Semper tin hende ku ta lanta diskushon. Tin ku ta berdaderamente preokupá, tin ku ta krea duda pa brua tera. Esaki ta pone ku ora ta trata di desishonnan di gobernashon, mester ta abierto, konsistente ku proseduranan i kouteloso ku interesnan enbolbí.
Kousa Komun 060713
|
