Tin ku dil ku duda.
Den un komunidat chikitu nos no por evitá ku tin persona ku ta karga diferente funshon i responsabilidat. Riba su mes esaki mester ta posibel, tanten ku e no ta un kombinashon ku por tin influensha direkto riba gobernashon, otro for di e influensha ku kada un di nos komo siudadano tin.
Den un komunikado di prensa anterior, Kousa Komun a señalá rumornan ku a trese un duda den komunidat riba integridat den gobernashon, a konsekuensha di dos situashon ku a keda komentá resientemente den medionan di prensa. A trese dilanti ku mester evitá situashonnan ku por lanta e duda ei. A konkluí tambe ku, una bes ku un duda ta eksistí, mester atendé kuné i kita esaki for di kaminda, pa e no bai hiba su propio bida.
Pa no tin niun malkomprondementu riba e mensahe ku Kousa Komun ke trese, ta bon pa ripití ku aki no ta kuestioná integridat di niun di e personanan en kestion. No tin motibu tampoko, pasobra tan aleu ku nos por weta, e duda ku a lanta ta basá riba rumor. I nos no ta duna balor na rumor.
Pero te hasta ora ta trata di un duda ku a nase di rumor tin ku dil ku e duda aki, pa e no bai forma parti di e imágen negativo ku ta reina di polítika en general.
Kousa Komun, 060616
|
