Parti puesto kobra pueblo
Ku hopi rason mayoria di sektor a protestá kontra nombramentu di sinku sekretario di estado. Un partido manera PAR, ku ta esun ku a hiba lei Staten pa redusí e kantidat di sekretario di estado na dos, mes ta bòltu esaki bèk. Esaki ta demostrá ku den sisteme polítiko, prinsipio i programa ta pida papel so. No por paga IFE, i sèn pa kuminda na skol a kaba. Ma ora tin ku inventá puesto sin kontenido pa traha koalishon, gobièrnu sí tin plaka.
Tòg esaki no mester sorprendé niun hende. Ounke ku riba su mes e ta un muestra di polítika oportunista, e kestion di sekretario di estado ta ñaña. Partimentu di kos ta un aktividat esensial di nos partidonan polítiko, sin eksepshon. Den pasado, pa komplasé a oumentá kantidat di minister. No tabata konosé e fenómeno di sekretario di estado mes. A inventá puesto di minister plenipotensiario suplente na Den Haag, mientras ku ántes direktor tabata aktua komo tal. Puesto di gezaghebber interino, i pa poko esun di gezaghebber mes, a bira kos pa parti entre partido. Kada minister, kada diputado i kada frakshon tin dos pa kuater kolaborador. I nan ta haña un posishon haltu di ámtenar ora gobièrnu baha. Asina sali chèns ta pone kompinchi riba stul di direktor di departamentu i servisio di gobièrnu. Mester konta aserka mas ku shen puesto di komisario den kompanianan di gobièrnu, algu ku a bira un fabor dje opvio ei, ku tin komisario ku mester pasa parti di nan salario pa kaha di partido. Ta trata di eliminá STiP, pa haña man liber den nombramentu di direktor di e kompanianan. I e nombramentunan polítiko ku aña aden aña afó ta subi agènda di BC i Konseho di Minister no ta kos di papia mes. Te na ora mester bandoná e stulnan di felpa, ta kore akomodá siguidó mas yegá na gran eskala. Sin niun eskrúpulo, pasobra no ta eksistí lei pa responsabilisá mandatario ku ta disidí en kontra di interes di pais.
Esaki ta e tristu historia di partimentu di kos na kua tur partido ku ta sostené un gobièrnu ta hasi nan mes kulpabel. Un mas ku otro kisas, pero tur sin eksepshon.
Banda di hopi grupo otro den komunidat, Kousa Komun no solamente a protestá, pero tambe a indiká kon pa limitá e práktika dudoso aki mas tantu posibel.
Durante di aña a trese dilanti ku mester revisá e sistema di koalishon, kambiando nos sistema elektoral. Ku mester regla pa lei e kantidat di minister i sekretario di estado, i limitá kantidat di kolaborador. Ku mester di transparensha den nombramentu di empleado públiko, teniendo esaki for di man di partidonan. I ku mester stipulá profil di kapasidat i komportashon estrikto pa miembronan di komisariado.
Si nos ta sinsero ku nos mes i ku pueblo, mester konstatá ku polítikamente nos no ta niun ora kla pa asumí responsabilidat pa un Kòrsou outónomo den Reino. Awor ku mester forma un struktura estatal nobo, nos tin un oportunidat úniko pa traha riba nos sistema elektoral, lei pa responsabilisá mandatario, sistema di salario i penshun pa mandatario i parlamentario, regla di étika i kondukta pa parlamentario, mekanismo di korekshon banda di esnan di kòntròl, nombramentu di empleado públiko, profil pa komisario den kompania di gobièrnu, i regla pa finansiamentu di kampaña polítiko.
Votando pa un Kòrsou outónomo den Reino den referèndem di aña pasá, pueblo a skohe pa nos pais desaroyá bai dilanti, no pa keda duna polítikonan man liber.
Kousa Komun, 060315
|
