 Vota pa kambio.
Bira un votador nobo
Den próksimo dianan, Kousa Komun lo laga parti un foyeto kas pa kas ku ta yuda kada votador haña e kandidato pa e vota riba dje. E ta un lista ku un splikashon chikitu di e diferensha entre un bon kandidato i un mal kandidato. E foyeto lo ta optenibel tambe serka un kantidat di supermerkado.
Usando e lista aki komo punto di salida, kada votador por sigurá su mes ku su voto ta bai pa un kandidato ku tin e personalidat, e kapasidat i e abilidat pa trese e kambionan ku ta saka nos for di miseria i hiba nos pais dilanti atrobe.
Sea ku nos a disidí kaba riba ken nos ta vota, òf nos ta duda entre kandidato ainda, òf nos a disidí di no bai vota, esaki ta nos chèns pa porfin vota pa kambio. Nos tur ke pa bini kambio den e situashon ku nos pais ta aden. I den nos sistema demokrátiko, e manera pa trese kambio ta dor di vota. Esta, vota konsientemente.
P’esei, si nos ke trese kambio, nos tin ku kambia nos manera di vota. A yega ora pa nos bira votador nobo.
Nos tin ku usa nos derecho di voto pa mustra partidonan ku nos ta eksihí nivel. Ku nos ke kandidatonan ku integridat personal, konosementu di materia, i kapasidat pa goberná. Ku nos ta stòp di bai sin mas tras di number un riba lista, tras di hende boka grandi i tras di promesa bunita. Ku nos ta pone kandidatonan sin integridat, ku falta di konosementu i sin kapasidat un banda. Nos ta skohe solamente entre e bon kandidatonan ku kalidat i nivel. I si nos no haña nan riba lista di nos partido preferí, nos ta buska nan bou di e otro partidonan.
Asina e chèns ku nos ta haña bon mandatario i parlamentario ta bira mas grandi. Ademas, partidonan lo ripará ku pueblo a disidí ku e ta vota pa bon kandidato ku kalidat, i laga mal kandidato un banda. Pa un próksimo elekshon, nan lo sòru pa nan pone bon kandidato riba lista i eliminá mal kandidato, pa asina nan haña mas voto. I nan lo sòru pa nan kandidatonan por profilá nan mes pa atraé e votador nobo.
Pero ta nos tin ku kambia i bira e votador nobo ei promé.
Kousa Komun, 060113
|
