Ku oportunismo nos no por vensé korupshon
 Reakshon di lidernan polítiko - despues ku e sentenshanan di korupshon den kasonan Godett i Abraham a bira irevokabel - ta devastador pa dignidat di nos pais. Na lugá di ekspresá e integridat i firmesa ku nan mester representá pueblo ku n’e, polítikonan a kai den un silensio ku ta papia palabra kla.
Ta konosí ku polítikonan gusta papia ku dos lenga. Pero for di dia ku e sentenshanan di korupshon den kasonan Godett i Abraham a bira irevokabel, nan a pèrdè tur dos. Turesten, via programanan na radio i korant, pueblo si ta vosiferá su disgustu ku e situashon di korupshon den polítika. Miéntras ku pueblo ta pidi integridat i firmesa di mundu polítiko, ta reina un silensio polítiko oportunista ku ta devastador pa dignidat di nos pais.
Loke pueblo ta puntra ta simpel: un polítiko ku a keda sentensiá pa korupshon por keda funshoná komo tal sin mas, si òf nò? E “punto di prinsipio” di nos polítikonan riba esaki a varia di dia pa dia, segun tabata kumbiní nan mihó:
|
“... hende no ta kulpabel tanten ku sentensia no dikta esei ...”
|
|
(riba su mes korekto)
|
|
“...mester warda ku konklushon te ora a kaba di kana e kaminda di hustisia kompletamente”
|
|
( esei no ta kita ku por tuma un posishon di prinsipio riba e asuntu)
|
|
“... si tabata miembro di nos partido, nos si lo a aktua di otro manera ...”
|
|
(pero tòg ta dispuesto pa aseptá esaki sin mas den parlamento?)
|
|
“... e kos aki ta asuntu interno di e partido konserní ...”
|
|
(si ta asina, tampoko mester a pasa lei ku ta regla finansiamentu di kampaña polítiko)
|
|
“... laga pueblo husga pa su mes den próksimo elekshon di 2006 ...”
|
|
(no ta polítikonan ta e promé yama pa tuma un posishon, na lugá di skonde tras di pueblo?)
|
Awor ku a kaba di kana e kaminda di hustisia i sentensia a bira irevokabel i no tin esküs mas, un silensio hermétiko a kai. Unda e par di pipita di polítiko ku ta pretendé di para pa integridat a keda? Aparentemente e prinsipio a bira “tur kos ta aseptabel, tanten ku e wega polítiko por kontinuá”.
I atrobe ta skonde tras di e mero hecho ku no tin lei ku ta prohibí un polítiko ku a haña un sentensia di korte pa funshoná komo tal. Pero pakiko mester di lei ora ta trata di un asuntu di integridat di pensamentu polítiko i moral humano? Akaso no por trata e asuntu den forma di un moshon? Ta remarkabel kon entre pueblo mes si no tin ningun problema pa pone e asuntu aki riba mesa.
E komunidat aki ya pa hopi aña ta sintié defroudá pa lidernan polítiko, pero por a konta riba su demas lidernan. Lidernan den sektor sosial, ekonómiko, finansiero, sindikal, spiritual, religioso, i di medionan di komunikashon. Notabel ta ku akinan tambe ta reina un silensio, ku algun eksepshon. Ku bista riba elekshon benidero, aparentemente ta kumbiní mas pa keda neutral? Si awor nos lidernan no-polítiko tambe kuminsá pone interes personal, komersial òf di gremio riba interes general, ta unda sobrá di komunidat tin ku buska inspirashon i afirmashon di su dignidat?
Responsabilidat pa bienestar di nos pais ta di nos tur. Ta bira tempu pa mas grupo den komunidat, tantu gremial komo profeshonal i di iglesianan, pero tambe siudadanonan individual tuma posishon públikamente. Awor ku polítikonan a faya atrobe, ta bira tempu pa pueblo papia pa su mes.
Mundu mester sa ku nos no a bandoná e lucha pa integridat i kontra korupshon. Ainda nò.
Kousa Komun, 051024
|
