Loke Venezuela duna, e por kita tambe
 E subida di preis di kombustibel tin di haber ku e kosto di krudo riba merkado internashonal. Nos no por influenshá esei. Pero e kosto pa e kombustibel yega na porta di pòmp di gasolin si ta un asuntu interno, ku e kosto di distribushon ku Curoil ta kobra i e akseins pa gobièrnu komo e faktornan mas importante. Einan si nos mandatarionan por hasi algu.
Mester disidí si e márgen di ganashi ku Curoil ta buta ariba ta kuadra ku e balor di e servisio ku Curoil ta presta, esta kumpra i distribuí e kombustibel. No tin manera mas ekonómiko di distribushon? Tokante e akseins, gobièrnu por hasi un estudio kiko e impakto ekonómiko ta si bah’é, i kompará esei ku e pèrdida di impuesto ku e ta nifiká pa gobièrnu.
Ademas, a bira tempu pa reorganisá nos sistema di transporte públiko di tal manera ku no ta nesesario mas ku un hende trahadó mester tin un outo pa e tin sigur ku e ta yega trabou na tempu, i pa muchanan di skol por move mas fásil entre kas i skol.
Manera nos ta weta, tin manera. Pero polítika no ke mishi ku heilige huisjes manera Curoil, ni weta entrada direkto pa gobièrnu baha. I transporte públiko no ta algu popular den kampaña elektoral. Aparentemente, ta buska e kaminda fásil atrobe, ku ta pidi doño di produkto un trato speshal.
Si nos ke un trato preferenshal di parti di Venezuela pa algu asina importante pa nos ekonomia manera kombustibel, lo ta bon pa nos realisá e otro banda di e medaya tambe.
Pasobra loke Venezuela duna Venezuela por disidí di kita tambe. Den añanan setenta di siglo pasá, pa kousa di un desakuerdo, Venezuela a yega di prohibí tur tráfiko di barku ku ta trese merkansia Kòrsou. Mesora a surgi un skarsedat enorme di berdura i fruta fresku.
Si pa salba nos ekonomia, i por lo tantu futuro di nos pueblo, nos mester dependé di beis di gobièrnu venezolano, esei ta un preis muchu haltu pa paga. Pasobra nos lo ta entregando parti di nos outonomia na un otro pais, algu ku pueblo di Kòrsou no a skohe p’e den referèndem di aprel.
Bon wetá, ya kaba nos a kuminsá paga. Pa e asuntu djis subi riba mesa, e grupo di polítiko ku a bai Venezuela luna pasá a haña nan mes den maniobra i situashonnan komprometedó na man di polítikonan i gobièrnu venezolano.
Nos ta hasi un apelashon na nos representantenan den Konseho Insular pa agotá tur e posibilidatnan lokal promé ku pensa mes pa mara nos kosto di energia, i ku esei nos outonomia ekonómiko, na kapricho di un otro pais. Ni Reino Hulandes no tin tantu influensha riba nos destino.
Kousa Komun, 050629
|
