Gobernashon transparente a bira gobernashon arogante
Arogansia di poder ta ora hende den un posishon públiko haña ku nan por interpretá regla i norma na nan manera, tambe ora esei ta violá balornan establesí den komunidat.
Por ehèmpel: un mandatario ta gasta plaka di representashon na paña i transportashon riba un manera ku mayoria di nos komunidat no ta konsiderá rasonabel. Su defensa ta ku tin regla di representashon ku ta laga espasio pa su interpretashon.
Arogansia di poder ta apliká tambe ora un gobièrnu haña ta bon pa interpretá lei i hustisia segun ta kumbiní é, poniendo un banda loke ta intenshon di lei i loke ta sintimentu di hustisia bou di pueblo.
Nombramentu riba puesto públiko di persona ku a haña sentensia pa aktonan froudulento ku ta perhudiká komunidat ta algu rechasabel. Na vários okashon komunidat a ekspresá esaki klaramente, tambe den e kaso di nombramentu di un “postmaster general”. Pa hustifiká su desishon, gobièrnu a usa e argumento ku ta trata di un persona ku a haña un kastigu kondishonal.
No mester brua kastigu ku sentensha. Ora korte dikta ku un persona ta kulpabel, e ta kulpabel. Punto. No ta eksistí algu manera kondishonalmente kulpabel. Kastigu kondishonal ke men únikamente ku lo no apliká e kastigu si durante e tempu stipulá pa wes e persona keda sin kometé delito atrobe. Kastigu kondishonal no ta kita ni pone di e kulpabilidat.
Ademas, e prosedura di nombramentu no tabata abierto. Gobièrnu a limitá su mes na skohe entre personanan ku ta konosí serka dje komo eksperto riba e tereno konserní. Ni maske kon spesialisá e puesto ta, no por limitá e grupo di kandidato. Mester tin un solisitut habrí pasobra no sa nunka ku por tin un hende mas mihó prepará i ku mihó kalifikashon ku esun ku bo tin na mente. Pais ta solamente sirbí ora e mehor hende ku tin disponibel keda apuntá den un funshon. E argumento ku minister por disidí segun su diskreshon pasobra no ta eksistí regla pa nombramentu di postmaster general no ta korekto. Reglamentá òf nò reglamentá, e regla básiko pa nombramentu pa puesto públiko semper ta ku mester tin transparensha total. Gobernashon transparente ta eksihí esei.
Tin un lus positivo chikitu. Gobiernu a rekonosé ku a kometé un eror, i ku lo koregí esaki. Pero un korekshon riba su mes no ta basta. Mester traha riba reglanan di gobernashon ku ta evitá e tipo di erornan aki di parti di mandatario, i ku ta regla nan responsabilidat.
Kaminda mester tabatin transparensia di poder, ku un prosedura di nombramentu abierto, ku mantenshon di integridat di puesto públiko, i ku rèspèt pa fayo di korte, awor ta resultá ku nos tin ku papia di arogansia di poder.
Demokrasia ta basá riba transparensia di poder.
Arogansia di poder i demokrasia no ta bai huntu.
Kousa Komun 9 di mei 2005
|
