Referèndem 2005: Kon pa disidí

Tur lugá hende ta puntra nan mes ta kon tin ku skohe un opshon ku e avalancha di informashon, foro i propaganda ku tin riba e kuater opshonnan.

Dia 8 di aprel, kada un di nos tin ku skohe segun su propio konsenshi, i no a base di opinion di otro. Pa por logra esaki, tin un par di kos pa tene kuenta kuné, i un par di paso ku por tuma.

Referèndem no ta un remedi

Na di promé lugá: ningun di e opshonnan no ta remedi pa e problemanan ku ta asotando nos komunidat riba tereno di pobresa, kriminalidat, norma i balor, korupshon, mal gobernashon, edukashon i salubridat. Struktura estatal ta un hèrmènt ku por yuda solushoná e problemanan aki. Ta nos mes tin ku hiba e lucha pa drecha pais, norma, balor, situashon sosial, ekonómiko, edukativo i di salú.

Paso ku bo por tuma pa yega na bo propio desishon

Ounke ku nos sa ku referèndem riba su mes no ta e milager ku lo solushoná nos problemanan, esei no ta kita ku nos mester disidí riba nos struktura estatal. Si nos no hasié, otronan lo fòrs’é riba nos.

Tin kuater paso ku kada un di nos por tuma pa e por yega na su desishon personal.

1. Deshasí bo mente di tur propaganda i papiamentu di gruponan ku ta pro òf kontra un òf otro opshon.
    
2. Fiha bo mes riba e delaster boletin #03 di Komishon di Referendum.
    
3. Forma bo propio vishon. Puntra bo mes ki sorto di komunidat bo ke pa nos isla ta. Básikamente, tin tres posibel vishon:
• Un komunidat ku ta sera forsa ku otro komunidatnan paresido pa huntu lucha i bai dilanti.
• Un komunidat ku ta pará riba su mes forsa, sin influensha direkto di otro komunidatnan, ounke e deseo por t’ei pa tin lasonan di koperashon ku otro.
• Un komunidat ku ta mara su destino na esun di un otro komunidat ku tin mas rekurso i posibilidat, i mas manera di kòntròl.
   
4. Skohe e opshon ku ta kuadra ku e vishon ku abo ke pa nos komunidat.

Kousa Komun ta deseá kada votadó e sabiduria i e serenidat nesesario pa e por skohe na pas ku su konsenshi.

Bai urna i hasi bo eskoho.
Si bo no bai, otronan lo disidí futuro di bo i di bo yunan.

Kousa Komun, 050404

Website design, implementation and maintenance by: