Anarkia polítiko
Den Bestuurscollege, koalishon no por yega na un akuerdo kon pa redusí gastunan di presupuesto di Kòrsou, algu ku tur hende sa ku nos no por karga mas. Koalishon den Gobièrnu Sentral no por haña otro, ni sikiera pa weta kon ta apartá fondo pa medida di emergensha kontra kriminalidat. Te ainda no tin un akuerdo polítiko kon pa kombatí pobresa. Sinembargo, den tur e káos aki, parlamentarionan a logra union un par di siman pasá. Nan a sa di haña basta miembro huntu pa tene un reunion di Staten. Nan a sa te hasta di haña otro den un desishon ku lo tene un enkuesta parlamentario pa deliberá profundamente ta dikon tin polítiko i èks-polítiko ku ta haña komplikashon serio di salú ora nan bai será. Ora di pone reunion pa diskutí kriminalidat, ta hunga wega polítiko ku seguridat di pueblo.
Señores polítikonan, pa pueblo, kriminalidat ta imágen horibel den medianan di reglamentu di kuenta den mundu di droga. Kriminalidat ta sufrimentu di esnan yegá na un morto inosente, alkansá pa bala den guera di droga, tròuma di e víktima di un atrako violento, miedu di un pueblo pa subi kaya den su propio pais, desesperashon di kada siudadano ku ta sera su kurpa den kas for di nueb’or di anochi warda ki ora atrakadónan ta basha su porta di kas abou pa terorisá. Pa polítikonan, e problema serio di kriminalidat ta komo si fuera un otro esküs pa hunga wega polítiko ku otro.
For di dia ku promé minister a bolbe for di Hulanda dos luna pasá ku un promesa di 60 mion florin pa kombatí pobresa, no a kai un palabra polítiko riba e pobresa ku ta asotando nos pais samsam ku kriminalidat. Pobresa no ke men sifra den un rapòrt. Pobresa ke men hende ku ta sufri kada dia di hamber, ku no tin baño ni flur, ku ta soportá malestar i malesa pasobra nan no tin moda, ku ta desesperá ku nan komunidat a bandoná nan.
Nos ta puntra nos mes si nos parlamentarionan a bira realmente siegu pa e berdadero angustianan di pueblo, ku ta pobresa i kriminalidat. Òf polítikonan ke skonde nan impotensia pa solushoná e problemanan real aki? Konsentrando riba otro problema ku si nan por trata kuné, nan por hasi manera nan tin kos bou di kòntròl atrobe. Pero si nan ta skohe pa limitá nan mes na mehorá kuido di polítikonan será den prison, biaha pa Santo Domingo i Italia pa promové turismo, i rechasá un rapòrt-Jesurun ku masha brio, ken mester kombatí pobresa i kriminalidat? Ken lo solushoná e problemanan finansiero di gobièrnu, di salubridat públiko, di kuponan di trabou, di falta di formashon, di muchanan indefenso, i di penshonadonan. Ken lo regla integridat i transparensha di e proseso polítiko?
Ku e evaluashon aki nos no ke ofendé algun polítiko ku si ta aktua di buena fe, tratando di representá interes di pueblo, lesando nan dokumentonan, i votando segun nan konsenshi di representante, i no pa interes di partido òf kampaña. Pero nan bon intenshon no ta kambia e hecho ku loke ta tumando lugá den seno di partidonan polítiko, den reunionnan di koalishon, den sala di Konseho di Minister, den Bestuurscollege, i den bankinan di parlamento no tin mando, no tin direkshon, no tin firmesa. Apénas tin gobernashon. Apénas tin oposishon.
Gobernashon ta aserkando e nivel di anarkia polítiko kaminda polítikonan korupto por fiesta sin kòntròl, i krímen organisá tin man liber. Kaminda pobresa i kriminalidat ta birando un way of life. Òf, dependiendo kon bo ta mir'é, un way of death.
Meskos ku na Haiti.
Kousa Komun, 041123
|
