Kampaña ta tapa problema
E kampaña den prensa hulandes pa enfatisá ku ta un minoria di hóbennan antiano ta kousando problema na Hulanda ta bon hinká den otro. Ounke ku un inisiativa asina ta di aploudí, nos tin ku pensa ta kiko e por logra na final di kuenta. Supuestamente, e por konvensé un par di invershonista hulandes ku ketu bai tin bon motibu pa invertí na Antia. E persepshon general serka públiko hulandes apénas lo kita. E asina yamá dies porshento ei ta keda daña impreshon di tur demas antiano.
Nos no ta bisa ku Gregory Elias a hiba kampaña robes. E ta bon hinká den otro, i e lo por logra su meta por parti.
Loke nos ke bisa ta ku tin e peliger ku un kampaña asina ta kita atenshon for di e problema mes. Nos sosiedat ta produsí e hóbennan aki. Esei, i no e persepshon ku Hulanda tin di nos komunidat, ta e problema fundamental.
E último frase di e anunsio por tabata otro. Na papiamentu, e ta bisa: “Nos ta orguyoso riba nos mes i nos no ta laga un grupo chikitu daña esei pa nos”. Aki ta drenta e peliger di “nan ku nan” i “nos ku nos”. Ta bèrgwensa falsu ta pone nos stòp di aseptá e drop out-nan komo miembro di nos komunidat. Pero, na promé lugá, nan ta nos próhimo. Na di dos lugá, tanten ku nan situashon keda eksistí, komunidat ta keda sufri problemanan soshal i kriminal.
Nos tin ku deshasí nos mente di e bèrgwensa falsu ku ta tapa nos wowo pa realidat. Nos tin ku rekonosé ku ta nos mes a forma e problema aki, i ku nos tin ku solushoné pa e no krese riba nos kabes.
Den nos materialismo, nos ta tuma tur loke por pa nos mes, nos famia i amigunan. Sin tene kuenta ku e lucha ku otronan tin ku hiba den nan situashon.
Nos tin ku logra un komunidat kaminda kada individuo tin espasio i medionan sufisiente pa traha na su propio desaroyo den un sistema ku ta demokrátiko den tur sentido. Esei ta si nos ke logra un komunidat kaminda kada individuo ta asumí su responsabilidat pa su mes i pa komunidat.
Kousa Komun, 030817
|
