Derecho di informashon
E manera ku gobièrnu di Kòrsou ta trata informashon vital riba e problema di puiru blanku di refineria Isla no ta pará riba su so. Tin un tendensha pa skonde informashon ku no ta na agrado di polítikonan. Pió ta ku den hopi kaso gobièrnu mes apénas tin e informashon nesesario pa por goberná. Bon gobernashon ta eksihí un gobièrnu kompletamente informá. Pero base di demokrasia ta un pueblo informá. Gobièrnu tin e deber di informá su mes debidamente, i pone e informashon ku e tin na disposishon di pueblo. Den kaso di polushon di Isla, kaminda ta trata di salú di hende, esaki no ta kos di papia mes.
Lamentablemente, e kaso aki no ta pará riba su só. Tur tempu a skonde i manipulá informashon tokante e impakto di e refineria riba salubridat públiko, medio ambiente, rekursonan natural manera awa di pos, gobernashon i polítika.
Den kaso di DCA ni representantenan di pueblo den Eilandsraad ni Bestuurscollege no a logra hañá e sifranan korekto for di gerensia, miéntras ku BC ta akshonista.
Ainda no ta konosí serka públiko bou di kua kondishon a duna kòntròl di aeropuerto Hato pa trinta aña den man di Alterra.
Esakinan ta djis un par di ehèmpel resien.
Pa loke ta e kaso di Isla, no tin ningun motibu pa tene informashon atras. Es mas, komo parti di su kompromiso pa defendé interes di komunidat, mandatarionan mester publiká un lista di tur dokumento ku ta konosí serka gobièrnu i su instanshanan, i eksihí di PDVSA i Shell pa hasi mesun kos. Bon gobernashon tambe ta nifiká bon informashon na nòmber di pueblo i na disposishon di pueblo.
I kaminda mandatarionan faya, medionan di komunikashon mester kai aden. Pasobra si papia di informashon na pueblo, medionan tambe tin un responsabilidat konsiderabel. Publikashon di atrako, desgrasia di tráfiko i redashi polítiko ta notisia, pero e atenshon eksagerá ku ta duna esakinan no ta duna mas balor na e notisia mes.
Investigashon serio i presentashon di informashon tokante gobernashon i desaroyo di nos pais ta esensia di e kompromiso ku prensa tin ku demokrasia.
Kousa Komun, 041011
|
