Enkuentro anual di Kousa Komun:
Kultura di miedu ta stroba nos demokrasia
Rebibando un tradishon di años, riba dia 9 di mart Kousa Komun a tene un enkuentro di kuminsamentu di aña ku su sostenedónan, pa mustra su apresio pa e sosten finansiero i moral ku nan ta dunando, i interkambiá di idea riba perspektivanan pa aña 2004.
Direktiva a duna un danki di kurason na sostenedónan di Kousa Komun, ku ya pa añanan kaba ta duna nan sosten moral i ademas un sosten finansiero chikitu pero esensial pa operashon di Kousa Komun. Ademas, a ekspresá un gran apresio pa medionan di komunikashon, pa nan sentido di demokrasia i responsabilidat ora nan publiká komunikadonan di Kousa Komun. Por último, Kousa Komun ta kontentu ku e reakshonnan di sosten kontinuo di henter komunidat, tantu riba kaya komo bishitando su wepsait www.kousakomun.org.
Durante di e enkuentro a introdusí un par di kara nobo, ku ta sra. Mayra van der Dijs, sr. Royston Sling, i sr. Anton Donkers. Nan a bin fortifiká e direktiva di ultimo añanan, konsistiendo di sra. Nilda Juliana komo sekretario, sr. Elco Karel, tesorero, sr. Alexander Isings, vise-presidente, i Dito Abbad komo presidente.
Ademas a duna un palabra di gran apresio na sr. Hipólito Florans, ku a retirá despues di a manehá ofisina di Kousa Komun durante hopi aña. Resientemente, ofisina di Kousa Komun a muda pa Kaya Fraternan di Skérpéné nr. 1, kamber 19.
Den su relato multi-anual, direktiva a para ketu un ratu na e aktividatnan ku Kousa Komun a entamá durante último kuater aña. Den aña 2000 a organisá kuater charla ku transmishon bibu i direkto na radio riba kultura di miedu, libertat di ekspreshon, bon gobernashon, i liderazgo. Na 2001 a lansá e akshon di banderita den korant i radio, ku mensahe kòrtiku i al kaso. Via komunikado di prensa a saka varios reakshon riba akontesimentunan ku ta afektá demokrasia. Entre 2001 i awor aki a saka mas ku trinta komunikado ku a haña nan kaminda pa públiko via korant, radio i televishon.
E tema di kultura di miedu tabata tópiko prinsipal di e relato. Nasé den tempu di katibu, el a bira un instrumento ku polítikonan ta usa pa manipulá votador dor di tene nan dependiente di fabor polítiko. Un pueblo ku ta ignorá su derechonan fundamental komo siudadano no por eksihí pa gobernante kumpli ku nan trabou, i ta haña su mes ta aseptá nan komo un fabor ku partido polítiko ta disidí riba dje. Niun gobièrnu no a logra kita e ignoransha aki.
Kultura di miedu ta limitá libertat di ekspreshon, i ta duna hende miedu pa kibra ku dependensha i tuma nan destino den nan propio man. P’esei, durante di e enkuentro, direktiva a anunsiá ku Kousa Komun ta trahando riba un programá ku ta enfoká riba e problema di kultura di miedu.
Kousa Komun 040309
|
