Imunidat parlamentario no ta pone
representante riba lei
Den su mishon pa protehá interes di komunidat, un parlamentario mester ta alerta riba asuntunan ku ta perhudiká pueblo i gobernashon, i señalá esakinan den parlamento na tempu. E mester por hasi esaki tambe ora e tin indikashon serio, pero no por duna prueba sólido. Ounke ku esaki por hasi daño na esnan involukrá, e parlamentario mester laga interes general prevalesé na momento ku komunidat tin hopi di pèrdè.
Komo ku esaki por resultá den un kaso di kalumnia kontra di e parlamentario ku ta hasiendo su trabou, a pone e regla di imunidat pa parlamentario. E regla aki ta protehá e parlamentario den su tarea, ofresiendo imunidat di palabra tanten ku e ta papia den parlamento. Por bisa ku komunidat ta ofresé un kapa di protekshon ora e eksponé su mes na defensa di e mesun komunidat ei.
Esei no ta kita ku un parlamentario mester konsiderá debidamente e daño ku su revelashonnan, hasí bou di kapa di imunidat, por kousa. I mas ainda pasobra esun ku e ta perhudikando no por hasi nada en kontra. Imunidat parlamentario no ta pone un representante di pueblo riba lei.
Si den parlamento un representante tira akusashonnan grave den laira sin duna ni un mínimo indikashon di su rason, djis pa defendé su posishon di kriminal konvikto, no solamente presidente di reunion i oposishon, pero tambe su koleganan di koalishon mester stret e.
Den un sistema demokrátiko, imunidat parlamentario ta un privilegio ku komunidat ta duna su representantenan pa nan sali na defensa di pueblo. I no pa nan malusá e privilegio aki pa probecho personal di nan posishon.
Kousa Komun, 040212
|
