Bispu di diktadura
Últimamente por tende bosnan ku ta bisa ku nos a drenta un gobernashon di diktadura. Ainda no ta asina leu. Oposishon por papia libremente. Sero Toleransha ta sigui ku su bon trabou di kombatimentu di krímen. Hato Team ta den full swing kontra trafikashon di droga na aeropuerto. Ministerio Públiko ta kontinuá ku investigashon di kasonan di korupshon. Korte di Hustisia ta monitor loke Ministerio Públiko ta hasiendo, i ta preparando pa di forma indepiente husga e kasonan ku esaki trese dilanti. Sinembargo, tin señalnan ku nos no mester ignorá. Señalnan ku por indiká ku diktadura ta na kaminda.
E manera ku formashon di gobièrnu a bai a trese un miedu ku por tin infiltrashon di kriminalidat den gobernashon. Ta reina tambe miedu pa un idioma polítiko agresivo i vengativo ku aparentemente no ta aseptá diskushon. Miedu pa ekspresá pensamentu diferente for di loke lidernan polítiko ta vosiferá. Miedu pa nan yamabo “bomba” na momentu ku no bisa si i amèn. Prekupashon pa metementu den institutonan independiente di nos sistema demokrátiko i posibel aktonan vengativo kontra institutonan i personanan ku ta bisa bèrdat desagradabel pa gobièrnu.
Tin konfushon tambe ora lidernan ekpresá nan ideanan polítiko personal komo doktrina di gobièrnu, ora ainda no tin akuerdo di gobernashon formá ni firmá. Meskos ta e kaso ora gabinete anunsiá ku tin un akuerdo di gobernashon pa despues sali na kla ku ketu bai koalishon tin desakuerdo riba e kontenido. Aki ta trata di un kaso kaminda deliberadamente duna informashon falsu.
No, ainda no ta asina leu, pero esakinan ta señalnan ku nos no mester ignorá. Konfushon, mal-informashon i miedu ta ingrediente di tur sistema diktatorial.
Kousa Komun, 1 sèptember 2003
|
