”Deklarashon Final”:
Karta habrí na
Konseho Insular di Kòrsou

Na 2005, Komishon di Referèndem pa Struktura Estatal a duna un splikashon imparsial di e kuater opshonnan. A base di esaki pueblo a skohe un opshon. Konseho Insular a ratifiká esaki, i Gobièrnu a haña mandato pa realisá esaki. Un delegashon di polítiko i eksperto a keda apuntá dor di Gobièrnu pa negoshá ku e otro partnernan den Reino. Konseho Insular, komo representante di pueblo, ta vigilá si e proseso ta kana segun e mandato ku pueblo a duna.

Pueblo a eksihí i tin e último palabra riba e forma di outonomia ku Kòrsou lo haña despues di negoshashon di Mesa Rondó. Konseho Insular di Kòrsou den un resolushon a ratifiká esaki. P’esei, deber di Konseho Insular ta simplemente vigilá e rumbo di e negoshashon, pa na final formalisá e loke pueblo disidí den referèndem final.

Slotverklaring òf Deklarashon Final ta un promé resultado konkreto di negoshashon. E no ta resultado final, pasobra e ta kubri solamente un par di aspekto ku ta toka outonomia. Awor ku Gobièrnu a entregá e Deklarashon Final na Konseho Insular pa ratifiká, promé tarea di representantenan di pueblo ta investigá si e akuerdonan den e Deklarashon ta kai dentro di e espasio ku e mandato di pueblo ta duna. Ku otro palabra, e pregunta ta si tin akuerdo ku ta diferenshá supstansialmente for di e noshon di outonomia ku por saka for di e boletin ofisial di Komishon di Referèndem 2005

E pregunta aki ta bira mas serio si konsiderá ku e diskushon fuerte ku a lanta den komunidat i entre partidonan polítiko no ta trese klaridat. Ademas ta asina ku lo kuminsá implementá algun di e akuerdonan promé ku mart di aña 2007, Esta, antisipando riba e próksimo konferensha di mesa rondó, i promé ku pueblo por a ekspresá su mes den e referèndem final.

Djamars awor Konseho Insular mester disidí. Pero te ainda no tin un idea kla kiko e Deklarashon Final ta enserá. Entre partidonan polítiko a lanta un politikeria i tumamentu di posishon partidista riba prinsipalmente e punto di outonomia. Pa pueblo, niun di e opinionnan no ta zona konvensente, pasobra tur ta karesé di un splikashon ophetivo i balansá.

Den kaso ku e Deklarashon Final tin areglo aden ku ta diferenshá supstansialmente for di e konsepto general di outonomia, no por sigui negoshá sin aprobashon di pueblo. Mas ainda, si kuminsá ku ehekushon for di awor aki, un referèndem despues di Mesa Rondó lo ta muchu lat.

Pa por forma un opinion balansá, pueblo mester di informashon dokumentá i imparsial, spesialmente riba kuater punto:

1. E areglonan tokante koperashon hudisial, finansiero i monetario ta aseptabel dentro di e deseo di outonomia?
    
2. E areglo tokante debe nashonal ta resultá den basta espasio finansiero pa hiba pais dilanti?
    
3. E deklarashon ta duna basta siguransa riba kalidat di gobernashon i integridat polítiko?
    
4. Riba kua otro aspektonan di outonomia, nashonalidat, relashon entre islanan i Hulanda, i gobernashon i desaroyo sosial i ekonómiko mester tin akuerdo promé ku kuminsá desmantelá Antia Hulandes?

E informashon aki mester sali di un komishon independiente, ku ta enkargá ekspertonan imparsial pa analisá e Deklarashon Final i prepará e informashon na pueblo. I si ta nesesario, e komishon mester tin e outoridat pa organisá un referèndem.

Pa sigurá independensha i imparsialidat di e komishon, e miembronan lo mester keda nombrá pa sektor sosial, sektor sindikal i sektor empresarial, sin niun intervenshon polítiko.

Nos ta supliká miembronan di Konseho Insular pa respetá nan responsabilidat komo representante di pueblo, i pone interes di pueblo riba interes di partido.

Kousa Komun 061127

Website design, implementation and maintenance by: