Karta habrí na parlamentarionan di Antia Neerlandes i di Kòrsou

Un gobièrnu di transishon demokrátiko

Pais Antia, i sigur isla di Kòrsou, ta den un krísis ku ta sofokando nos komunidat. Awor ku tantu gobièrnu sentral i insular a retirá, nos ta bai kai den un temporada sin gobernashon, te ora, tardi òf trempan, otro koalishon òf elekshon resultá den instabilidat polítiko atrobe. Wetando e deskonfiansa general ku tin den mundu polítiko, i e konfushon serka polítikonan mes, hopi hende ta puntra nan mes si un koalishon nobo òf un elekshon ta e solushon na e momentu aki. P’esei, e posibilidat di un gobièrnu ku no ta konsistí di polítiko a bira tópiko di dia. Esta, un gobièrnu di transishon, sostené direktamente pa tur sektor den komunidat. Su úniko interes ta ehekutá dentro di dos aña e mandato ku e haña pa guia pais na un salida for di e abismo di ekonomia, edukashon, pobresa, korupshon i kriminalidat ku nos ta aden.

Un gobièrnu di transishon, ku ademas ta pasa leinan ku ta regla integridat, responsabilidat i kondukta di polítikonan i mandatarionan. Último tempu, tur kaminda hende ta diskutí si un solushon asina ta faktibel. Segun Kousa Komun, ta pueblo mes por duna e respuesta. Ta komunidat, den tur su sektornan, por lanta bisa ku ta basta ku politikeria, i ku e ta eksihí un gobièrnu di transishon.

Un gobièrnu di transishon demokrátiko mester tin sosten di parlamento. Esaki ta un yamada na nos parlamentarionan pa laga nan sentido di bon siudadano guia nan i laga interes general prevalesé.

1. Situashon di pais ta sumamente krítiko i sin perspektiva awor ku tantu gobièrnu sentral komo insular a kai.
2. Problemanan di un magnitut nunka ántes bisto den nos pais ta stanka desaroyo, krea pobresa, stimulá kriminalidat i kibra norma i balor.
3. Desishonnan klave i polítikamente desagradabel mester kai, i ehekushon di rapòrtnan riba ekonomia, pobresa, enseñansa, kriminalidat i integridat no por warda mas.
4. Durante último tres gabinete antiano, mas i mas koalishonnan a maniobrá nan mes den un posishon ku gobernashon efektivo a base di koalishon ta parse di ta imposibel por lo pronto.
5. Pueblo di Antia, speshalmente esun di Kòrsou, a pèrdè konfiansa den polítikonan.
6. Partidonan mes tampoko tin konfiansa den otro.
7. Hulanda a pèrdè konfiansa i te asta interes den nos pais.
8. Mundu internashonal ta pèrdiendo konfiansa den nos abilidat pa kontrolá kriminalidat, korupshon, i restablesé stabilidat polítiko.

P’esei nos ta dirigí un apelashon na nos parlamentarionan pa:

1. Demostrá grandesa síviko i aseptá un moratorio polítiko durante dos aña.
2. Uni nan responsabilidat parlamentario i demokrátikamente aseptá i respaldá un gobièrnu di transishon, ku ta konsistí di personanan intachabel i liber di influensha polítiko, salí for di komunidat, ku ta gosa di konfiansa di tur sektor di nos pais. Persona ku tin konosementu di nan respektivo áreanan di responsabilidat, tin afinidat ku e aspekto sosial-humano, i ku por funshoná komo un tim.
3. Duna e gobièrnu di transishon mandato pa den dos aña:

   trese konfiansa bèk den gobernashon i gana rèspèt bèk pa outoridat; establesé un diálogo tripartit ku komunidat; habri kaminda pa ekonomia floresé; ataká e problemanan ku ta kousa pobresa; fomentá norma i balor tantu den gobièrnu komo den komunidat; saka enseñansa for e abismo ku e ta den; kontinuá i reforsá e lucha kontra kriminalidat, droga i korupshon; dekretá regla- i leinan pa establesé integridat i responsabilidat di mandatario, kondukta di parlamentario, i finansiamentu di partido polítiko; ehekutá rekomendashon di rapòrtnan klave ku ya ta eksistí; drecha relashon ku Hulanda; laga analisá sistemanan elektoral alternativo i laga pueblo skohe esun ku nan ta preferá den un referèndem; enkargá un estudio independiente i no-polítiko riba opshonnan pa futuro struktura estatal, ku òf sin Hulanda i Oropa, i pasa un lei di referèndem desisivo riba esaki.

No menospresiá e último krenchi konfiansa ku ta enserá den e súplika aki i duna pueblo e oportunidat aki pa sali for di e abismo ku nos ta aden. Nos ta sigur ku pa mayoria, un gesto asin’aki lo no wòrdu konsiderá un “brevet van onvermogen”, pero mas bien un prueba ku, atraves di tur kos, nos polítikonan ta kapas pa rekonosé ku interes general ta pará riba interes polítiko.

Al fin i al kabo, partidonan polítiko por usa e temporada aki pa reflekshoná riba nan responsabilidat demokrátiko, i prepará nan programa di partido, kampaña di informashon elektoral, i lista pa elekshon di tal manera ku pueblo por bolbe haña konfiansa den nos polítikonan, i por bai vota  bon informá i konsiente aki dos aña.

Kousa Komun, 13 di aprel 2004

Website design, implementation and maintenance by: