|
Esei ta un bon pregunta.
Pakiko vota atrobe?
- Pa sigui mira mandatario maltratá nos isla?
- Pa sigui mira partido bringa otro?
- Pa sigui mira polítiko pone nos kara na bèrguensa?
Tòg nos ta vota si!
Nos ta vota pa nos mes bisa ken por tuma desishon pa nos. Pero… nos mester vota mas sabí. Pasobra partidonan a faya ku nos pais. Nunka mas nos no ta regalá partido nos voto sin mas. Nunka mas nos no ta vota sin mas pa number 1 riba lista. Elekshon no ta fiesta di partido, i e no ta un sertámen di popularidat entre lider di partido. P’esei nos no ta wak partido i programa so. Nos ta wak e kalidat di hende riba lista.
Nos ta vota pa e mihó hende
Nos ta vota pa e mihó kandidato, sin importá unda e ta pará riba lista. Asina partidonan lo sinti ku nos ta eksihí nivel. Si nos tur hasi esei, nos ta mustra partidonan ku ta e kalidat di kandidatonan ta konta. No boka grandi den kampaña. Ni partimentu di fabor, ku sèn for di nos mes saku.
Esaki ta un
BON kandidato |
Esaki ta un
MAL kandidato |
|
|
|
Su personalidat: |
Su personalidat: |
- E ta konfiabel i e sa kiko por òf no por
- E ta aktua ku kurashi, maske e por pèrdè voto.
- E ta usa su poder pa sirbi nos pais.
- E tin e disiplina pa pone su mes interes un banda.
|
- E ta un bèrguensa pa nos mes, pa nos yunan i nos pais.
- E ta hasi dushi riba nos lomba, pa keda popular.
- E ta malusá nos voto pa manipulá manera e kièr.
- E ta kai den tentashon pa pone su mes interes dilanti.
|
|
|
|
Su kapasidat: |
Su kapasidat: |
- E sa reglanan di pais i reglanan di demokrasia.
- E ta komprendé i por solushoná nos problemanan.
- E por guia nos den desaroyonan mundial.
- E ta realisá e konsekuensia di tur loke e bisa òf hasi.
|
- E konosé regla solamente ora e ta konta pa otro.
- E no tin e konosementu pa por goberná un pais.
- E ta laga tur chèns pasa ku mundu por ofresé.
- E ta kousa daño pa nos pais sin e mes sa.
|
|
|
|
Su abilidat pa trese kambio |
Su abilidat pa trese kambio |
- E sa bon unda nos mester bai i kon pa yega ei.
- E ta fiha un rumbo kla i ta sigui’é sin bira bira.
- E ta hasi uso di hende kapasitá pa trese solushon.
- E ta midi progreso i ta duna kuenta i rason.
|
- E no tin vishon pa por alkansá niun meta.
- E ta kambia di rumbo ki ora ku ta kumbiní su partido.
- E ta nombra hende ku e debe fabor, sin mira kapasidat.
- E ta tira falta riba otro, pa no duna kuenta i rason.
|
Partidonan no ta trese kambio
Loke si nan a hasi, a resultá masha malu pa nos pais. Nos debe nashonal a bira asina haltu, ku e ta primi nos abou. Nos dolónan a sigui krese, miéntras nan ta dispidí nos isla pa keda na poder. Mundu a bai laga nos, miéntras nan ta ranka nos isla den direkshon kontrario pa bringa otro.
Awèl nos mes ta trese kambio
Komo pueblo drechi, nos ta trese kambio na un forma drechi. Nos ta usa nos derecho di voto pa mustra partidonan ku nos ta eksihí nivel. Nos no ta vota sin mas pa number 1 riba lista, pa e hasi i deshasí. Nos ta vota pa e mihó hende, sin importá su posishon riba lista. I nos ta hasi esei den tur elekshon ku ta sigui.
Laga Shon Arei pa kuenta di Nanzi
Vota pa e mihó kandidato |
!
|
Kousa Komun janüari 2006
|
