Origen i futuro
Kousa Komun a lanta dia 10 di desèmber 1985, despues ku un grupo di siudadano, inspirá pa un charla di e historiadó Oscar Castillo, a bini huntu i a konstatá un deterioro serio den nos sistema di gobernashon demokrátiko. E grupo di Kousa Komun a konstatá e tempu ei ku :
- Nos sistema di gobernashon demokrátiko no ta funshoná komo un base pa desaroyá nos pais;
- Institushonnan, reglanan i instrumentonan vital pa un bon funshonamentu di gobièrnu a bai atras;
- Konfiansa den nos sistema di gobernashon a baha gradualmente;
- Deterioro di nos sistema di gobernashon por kulminá den un final abrupto di nos sistema demokrátiko.
Vishon di Kousa Komun
Kousa Komun tin e siguiente vishon pa nos komunidat:
Un komunidat kaminda kada individuo ta asumí su responsabilidat individual i pa su komunidat, i kaminda kada individuo tin espasio i medionan sufisiente pa traha na su propio desaroyo den un sistema ku ta demokrátiko den tur sentido.
Meta i Mishon di Kousa Komun
Meta di Kousa Komun ta pa yuda sanea nos sistema di gobernashon demokrátiko pa evitá ku nos ta kai den diktadura, manera a sosodé kaba na otro pais. Nos mishon ta pa kontribuí na un komunidat demokrátiko duradero basá riba:
- sentido di responsabilidat propio i soshal di kada siudadano;
- struktura i mekanismonan efektivo, konsiderando ku demokrasia no ta un prinsipio di gobernashon so, sino tambe di interakshon soshal den tur aspekto i sektor di un komunidat.
For di kuminsamentu Kousa Komun a aserká su meta for di diferente ángulo i ku bo yudansa nos lo sigui :
- Analisá i hasi proposishon pa restrukturá nos sistema di gobernashon demokrátiko
- Tene charla, simposio i otro forma di enkuentro;
- Guia lidernan potenshal di nos komunidat ku tin e boluntat, integridat i kapasidat pa introdusí renobashonnan nesesario;
- Informá i stimulá siudadanonan pa hasi uso optimal di nan derechonan demokrátiko pa yuda introdusí kambionan nesesario;
- Kooperá ku otro organisashon i moveshon ku ke protehé i mehorá nos sistema di gobernashon demokrátiko.
Puntonan di salida
Kousa Komun ta basa implementashon di su mishon riba:
- Ophetividat polítiko sin hasi diferensia entre partidonan polítiko òf sektornan den komunidat;
- Responsabilidat síviko: nesesidat pa señalá desaroyonan ku ta afektá demokrasia òf e espasio pa desaroyo individual;
- Bèrdat i rèspèt: trese bèrdat dilanti sin falta rèspèt;
- Planifikashon interno: determiná adelantá, i evaluá kontinuamente prioridatnan i áreanan di aktividat, akshonnan i medionan;
- Koordinashon ku otro organisashonnan: kolaborá ku otro organisashonnan riba tareanan spesífiko ku ta kuadra ku e mishon.
|
