Polítikonan tambe tin protekshon den nos estado di derecho
17 di desèmber 2002
Nos isla i nos pais ta pasando den un fase hopi doloroso i bergonsoso, na momentu ku Ministerio Públiko a establesé ku tin sospecho di aktonan koruptivo kontra tres diputado i un minister. Siudadanonan a reakshoná ku sintimentu miksto, pero en general ta reina un ambiente di speransa i hustisia ku porfin por kuminsá kontené korupshon den seno di gobièrnu, pa doloroso ku esei por ta pa nos komunidat.
Ta na su lugá pa den e periodo difísil aki, polítikonan mustra liderazgo, i atmití ku mester tin kòntròl muchu mas estrikto, den tur sentido di palabra. Na lugá di esei, ta sklama ku mester investigá manera di aktua di Ministerio Públiko. Ku asombro Kousa Komun a tuma nota di e manera aki di weta mundu kabes abou.
Laga nos no lubidá ku ta gobièrnu a hasi denunsia serka Ministerio Públiko di supuesto iregularidatnan serka kompanianan di gobièrnu. Dia Ministerio Públiko a hasi "inval" na ofisina di e kompanianan, no a tende ningun polítiko eksihí rèspèt pa e posishon di e direktornan konserní. Ministerio Públiko a hasi inval na diferente kas di hende, buskando pruebanan. Ningun polítiko no a eksihí un investigashon Awor ku a hasi mesun kos na ofisina di gobièrnu insular, pasobra tin sospecho ku sierto polítikonan tambe ta metí den aktonan bergonsoso, ta haña ku mester investigá e manera di proseder di Ministerio Públiko.
Lei pa un, lei pa tur. Si ta haña korekto ku ta penetrá den kas di hende ora tin sospecho di aktonan kastigabel, no por kuestioná e mesun akshon na momentu ku esaki ta sosodé den sede di gobièrnu. Na nos pareser, mester konsiderá kas di hende te asta mas sagrado ku edifisio di gobièrnu, ku al fin i al kabo ta edifisio públiko.
Nos ta biba den un estado di derecho. Listramentu den kas di hende òf edifisio privá ta un invashon di privasidat. Pa hasi un inval, Ministerio Públiko mester di permiso di Korte di Hustisia. Wes ta investigá si e sospecho ta basta supstansial, i si e akto bou di investigashon ta basta serio pa hustifiká un medida asina pisá.
Si un siudadano,sea ku e ta polítiko òf no, haña ku Ministerio Públiko, polis òf otro outoridat a trat'é inhustu, grosero, inkonsekuente, ku forsa eksagerá òf ku menospresio pa su integridat personal, e por akudí serka hues. Lo no ta promé biaha ku Korte ta laga un sospechoso liber p'e echo ku Ministerio Públiko a violá derecho di e persona.
Si tin polítiko ku ta opiná ku Ministerio Públiko a aktua di un manera inkorekto, nan tin ku akudí serka Korte di Hustisia, na lugá di nan mes nombra un komishon ku tin ku evaluá loke mester ta den man di wes. Nos polítikonan tin ku duna e bon ehèmpel, ounke kon doloroso e situashon ta.
|
