Korupshon ta forma un menasa grandi pa un komunidat. Korupshon no solamente ta korumpí mente i alma di nos hendenan pero tambe tin konsekuensha negativo pa desaroyo ekonómiko ku na su turna ta stroba yudansa na esnan ménos pudiente.

• Kaminda tin korupshon negoshantenan ta haña nan konfrontá ku e nesesidat pa paga bou di mesa esta si por ehèmpel nan ke haña un pèrmit òf pa "lòs" nan  merkansia riba waf mas lihé. Si e tipo di korupshon aki bira komun e por stroba invershon nobo ya ku e gastu pa hasi negoshi ta bira muchu haltu. Den otro kaso e negoshante por disidí di  kobra e konsumidó e sèn ku el a paga bou di mesa subiendo su preis.
   
• De un komunidat kaminda praktiká di korupshon a bira lukrativo, e mentenan mas sabí di e komunidat por kai den tentashon pa dediká nan talento riba saka probecho for di korupshon na  lugá di hasi trabou produktivo. Esaki ta afektá e posibilidat di un pais pa krese ekonómikamente i perkurá pa bienestar di su siudadanonan.
   
• Den paisnan ku ta risibí fondo pa desaroyo korupshon por tin un influensha negativo riba efektividat di e yudansa finansiero. En bes di solushoná e problema ku e pais donòr a identifiká e sèn ta disparsé den pòtmòni di hende ku no ta den e sirkunstansha prekario ku ta meresé yudansa.
   
• Ora korupshon tuma lugá den esfera di belasting e ta baha entrada di gobièrnu i por ta kousa di mas belasting òf por stroba ku gobièrnu ta kumpli ku su debernan finansiero. Si gobièrnu  mester subi belasting esaki ta baha aktividat ekonómiko i ta eliminá kupo di trabou. Ora gobièrnu mester fia plaka pa kubri su défisit esaki lo kousa ku interes di banko lo subi ku al  final ta bin resultá den un kosto di bida mas haltu.
   
• Korupshon por resultá den proyekto ku ta resultá mas karu i ku tin ménos kalidat pasobra a tuma desishon a base di sèn bou mesa i no a konsiderá kiko ta e mihó dil pa komunidat. Al fin i al kabo ta komunidat su sèn ta disparsé den saku di hende sin eskrúpulo.

Resumiendo: Mester ta kla pa un i tur ku korupshon ta pone ku nos kada un ta sufri pa un grupito  djòdjò, yena nan saku i biba dushi. Tòg nos komunidat no ta aparentá di ta kompletamente konsiente di e efektonan negativo ku korupshon tin riba nan bienestar personal. P'esei Kousa Komun ta publiká  un kantidat di teksto pa kontribuí na alsa e nivel konsenshi di nos poblashon. Lo publiká e tekstonan na radio i den diferente korant lokal.

Website design, implementation and maintenance by: