Ken ta disidí pa Kòrsou riba struktura estatal?
Mes tantu informashon ku Konseho Insular ta duna riba e posibel modelonan estatal pa Kòrsou, mes tiki informashon e ta duna riba e forma ku ta bai tuma e desishon final. E kampaña "Yuda nos Pensa", i e manera konsistente ku Konseho Insular ta hibé, ta masha positivo komo método pa informá i tende opinion di pueblo. Pero loke ta alarmante, ta ku Konseho Insular ni Gobièrnu di Kòrsou no ta duna niun garantia ku pueblo mes lo disidí finalmente riba su futuro estatal.
Konseho Insular no ta sigur ku lo tene un referendum. Konseho Insular a laga kaminda habrí pa e mes tuma un posishon riba struktura estatal despues di evaluá e pensamentu di pueblo. Esaki por nifiká ku ta pone referendum si e reakshon di pueblo no ta muchu kla. Pero e por nifiká tambe ku Konseho Insular mes ta fiha un posishon pa Kòrsou, si e reakshon di pueblo no ta na su agrado. Imagin'abo, esaki lo ta meskos ku si gobièrnu disidí di legumai elekshon, despues di tende kiko pueblo ta opiná.
Skohe un struktura estatal tin un karakter hopi mas fundamental i mas definitivo ku skohe un gobièrnu. E úniko hendenan ku por tuma un desishon riba un asuntu asina kardinal pa futuro di nan mes i nan yunan, ta pueblo mes. Mester sigurá ku kada siudadano ku tin derecho di voto, ta haña e oportunidat pa registrá su posishon ofisialmente. Na aña 1993 Kòrsou a organisá un referendum ku e opservador di Nashonnan Uní a proklamá ehemplar. Tur loke ta ménos ku esei lo ta en kontra di e derecho mas fundamental di kada siudadano.
E hecho ku a resultá difísil pa realisá e opshon estatal ku a skohe na 1993, no ta motibu pa kita e instrumento di referendum for di pueblo. Akaso ta kita derecho di voto for di pueblo, ora gobièrnunan frakasá despues ku pueblo a vota pa nan? E argumento ku pueblo a uza referendum na 1993 pa kastigá gobièrnu, tampoko no ta kita for di e balor di un referendum. Si partidonan polítiko ke evitá ku esei ta sosodé atrobe, nan mester laga kada hende disidí trankil, sin forma un frente uní pa pusha nan opshon partikular dilanti manera a sosodé na 1993.
Ta di aploudí ku Konseho Insular ta hasi asina tantu esfuerso pa duna informashon i inventarisá opinion di pueblo. Pero laga nos tene realidat na bista. Ku algun eksepshon, mayoria di e ruedanan di informashon den bario ta sumamente pober bishitá. E tiki hendenan ku presentá, hopi biaha ta e mesun hendenan. Gran mayoria di pueblo no tin computer, te pa nan duna nan opinion via internet. En korto, ta masha bon ku Konseho Insular ta pidi pueblo Yuda Pensa, pero no pa despues uza esei komo mandato pa Konseho Insular mes disidí.
E fecha supremo ta aserkando. Esei ta dia 2 di yüli, dia di Kòrsou, e dia ku Konseho Insular ke proklamá su posishon riba e asuntu aki. Komo parlamento di un pais demokrátiko, ta un kos so Konseho Insular por proklamá, i esei ta ku e no ta tuma niun desishon sin ku pueblo mes skohe su futuro estatal den un referendum ofisial.
|
