No ta bai pa e marka, sino pa e mensahe
 Kousa Komun, 31 di òktober 2003
En prinsipio, BC no tin nodi di defendé desishon di outo, pasobra generalmente no ta di importansha den ki marka di outo mandatarionan ta kore.
E publisidat ku a lanta entorno di e último desishon di BC ta remarkabel. Pasobra riba su mes e desishon pa baha gastu i buska outo tipo diesel na lugá di gasolin ta di aploudí.
Aparentemente, BC a haña dos oferta di diesel. Por a skohe entre un outo ku ta símbolo di luho i plaka, i unu ku ta para pa transporte efisiente i ku ta kosta menos na lease.
Sinembargo, di e dos opshonnan aki, BC a skohe esun ku ta manda diferente mensahe robes. E desishon di BC no a tene kuenta ku situashon finansiero di gobièrnu, ni ku imágen frágil di polítikonan, ni ku realidat sosial i ekonómiko di nos isla.
E mensahe ta ku diputadonan mes no ta praktiká loke nan ta eksihí di servisionan di gobièrnu i empleadonan públiko. Asina si ta bira difísil pa sanea finansa di gobièrnu.
E desishon ta konfirmá e persepshon den pueblo ku polítikonan ta bisa un kos pa haña voto, hasi otro ora nan sinta. I ku nan no tin e madures pa enfrentá e realidat di nos pais ku nos tur ta sinti den nos saku.
Na mesun momento, e mensahe ta duna un señal robes ku na final di kuenta kisas situashon ekonómiko no ta dje malu ei manera otronan ta bisa.
Pero e mensahe prinsipal ta ku polítikonan no ta solidario ku un komunidat ku ta sufri bou di e peso di pobresa, insertidumbre i miedu pa futuro, i ku ta sinti ku nos ta riba un rumbo ku no por kaba nada bon.
|
